Samarqandda "qoradori" savdosi bilan shug`ullangan jinoiy guruhlar faoliyatiga chek qo`yilgan. Bu haqda DXX Samarqand viloyati boshqarmasi darakchi.uz’ga xabar berdi.
DXX Samarqand viloyati boshqarmasi tomonidan boshqa huquqni muhofaza qiluvchi organlar xodimlari hamkorligida giyohvandlik vositalarining noqonuniy aylanmasiga qarshi kurashish yo`nalishida o`tkazilgan.
Unda Samarqand shahri “Yuqori Xo`jasoat” mahallasida yashovchi 1986 yilda tug`ilgan P.X., 1983 yilda tug`ilgan F.R., hamda U.R.larning giyohvandlik vositalari noqonuniy savdosi bilan shug`ullanib kelayotganligi ma`lum bo`lgan.
Toyloq tumani hududida o`tkazilgan tezkor tadbir natijasida yuqorida nomlari keltirilgan fuqarolar “Nexia 3” rusumli avtomashinada harakatlanib ketayotgan vaqtda huquqni muhofaza qiluvchi organlar xodimlari tomonidan to`xtatib tekshirilganda avtomashina salonida 5 gr. “geroin” giyohvandlik vositasi borligi aniqlanib, holat xolislar ishtirokida prosessual tartibda rasmiylashtirilgan.
Xuddi shunday holat Urgut tumanida ham kuzatilib, 1971 yilda tug`ilgan, “Sariqtepa” mahallasida yashovchi D.M., 1983 yilda tug`ilgan, “Chinor” mahallasida yashovchi Z.A. hamda 1989 yilda tug`ilgan, “Mo`minobod” mahallasida yashovchi F.R.larning ham giyohvandlik vositalari oldi-sotdisi bilan shug`ullanib kelayotganligi aniqlangan.
Jinoiy guruhning noqonuniy faoliyatiga chek qo`yish maqsadida huquq-tartibot idoralari xodimlari tomonidan olib borilgan tezkor tadbirlar natijasida D.M, Z.A. va F.R.lar tuman hududida 911 gr. “ekstraktli opiy” giyohvandlik vositasini mahalliy fuqaroga 20 ming AQSh dollari evaziga sotayotgan vaqtda tezkor guruh tomonidan qo`lga olinib, xolislar ishtirokida rasmiylashtirildi.
Hozirda yuqorida keltirib o`tilgan har ikkala holat yuzasidan O`zbekiston Respublikasi Jinoyat Kodeksining tegishli moddalari bilan jinoyat ishi qo`zg`atilishi rejalashtirilib, surishtiruv ishlari olib borilmoqda.
