Самарқандда "қорадори" савдоси билан шуғулланган жиноий гуруҳлар фаолиятига чек қўйилган. Бу ҳақда ДХХ Самарқанд вилояти бошқармаси darakchi.uz’га хабар берди.
ДХХ Самарқанд вилояти бошқармаси томонидан бошқа ҳуқуқни муҳофаза қилувчи органлар ходимлари ҳамкорлигида гиёҳвандлик воситаларининг ноқонуний айланмасига қарши курашиш йўналишида ўтказилган.
Унда Самарқанд шаҳри “Юқори Хўжасоат” маҳалласида яшовчи 1986 йилда туғилган П.Х., 1983 йилда туғилган Ф.Р., ҳамда У.Р.ларнинг гиёҳвандлик воситалари ноқонуний савдоси билан шуғулланиб келаётганлиги маълум бўлган.
Тойлоқ тумани ҳудудида ўтказилган тезкор тадбир натижасида юқорида номлари келтирилган фуқаролар “Nexia 3” русумли автомашинада ҳаракатланиб кетаётган вақтда ҳуқуқни муҳофаза қилувчи органлар ходимлари томонидан тўхтатиб текширилганда автомашина салонида 5 гр. “героин” гиёҳвандлик воситаси борлиги аниқланиб, ҳолат холислар иштирокида процессуал тартибда расмийлаштирилган.
Худди шундай ҳолат Ургут туманида ҳам кузатилиб, 1971 йилда туғилган, “Сариқтепа” маҳалласида яшовчи Д.М., 1983 йилда туғилган, “Чинор” маҳалласида яшовчи З.А. ҳамда 1989 йилда туғилган, “Мўминобод” маҳалласида яшовчи Ф.Р.ларнинг ҳам гиёҳвандлик воситалари олди-сотдиси билан шуғулланиб келаётганлиги аниқланган.
Жиноий гуруҳнинг ноқонуний фаолиятига чек қўйиш мақсадида ҳуқуқ-тартибот идоралари ходимлари томонидан олиб борилган тезкор тадбирлар натижасида Д.М, З.А. ва Ф.Р.лар туман ҳудудида 911 гр. “экстрактли опий” гиёҳвандлик воситасини маҳаллий фуқарога 20 минг АҚШ доллари эвазига сотаётган вақтда тезкор гуруҳ томонидан қўлга олиниб, холислар иштирокида расмийлаштирилган.
Ҳозирда юқорида келтириб ўтилган ҳар иккала ҳолат юзасидан Ўзбекистон Республикаси Жиноят Кодексининг тегишли моддалари билан жиноят иши қўзғатилиши режалаштирилиб, суриштирув ишлари олиб борилмоқда.
