O`zbekiston Respublikasi Prezidenti Shavkat Mirziyoev Tojikiston Respublikasi Prezidenti Emomali Rahmonning taklifiga binoan davlat tashrifi bilan bo`lib turibdi.
Tashrif doirasida Dushanbe shahrida O`zbekiston-Tojikiston investisiya biznes-forumi bo`lib o`tdi.
Tadbirga Tojikiston bosh vaziri o`rinbosari Usmonali Usmonzoda va O`zbekiston bosh vaziri o`rinbosari Jamshid Xo`jaev hamraislik qildi. Forumda, shuningdek, ikki mamlakat ishbilarmon doiralarining 600 dan ortiq vakillari, vazirlik va idoralar, tarmoq birlashmalari va viloyat hokimliklari rahbarlari ishtirok etdi.
Biznes-forumda O`zbekiston-Tojikiston sarmoyaviy kompaniyasining roli alohida ta`kidlandi, uning resurslaridan foydalanish uchun umumiy qiymati 135 million dollar bo`lgan 14 ta loyiha ro`yxati shakllantirildi.
“Kompaniyamiz biznesning metallurgiya, qurilish, qurilish materiallari, plastmassa buyumlari ishlab chiqarish, qishloq xo`jaligi, kimyo sanoati, tibbiyot, media sanoati va boshqa yo`nalishlarida loyihalarni amalga oshirmoqda. Korxonamizda 3 mingga yaqin xodim ishlaydi. 2015 yildan boshlab biz ham xitoylik investorlar bilan faol hamkorlik qilib kelmoqdamiz, bugungi kunda 10 ga yaqin qo`shma korxona faol ishlamoqda”,– deydi 15 ga yaqin kompaniyani o`z ichiga olgan BA Holdingning ijrochi direktori Tojimirzaeva Go`zalxon Bahodirovna.
Jamshid Xo`jaev o`zining qutlov so`zida ikki davlat rahbarlari o`rtasidagi ishonch tufayli so`nggi yillarda sezilarli darajada mustahkamlangan ko`p qirrali o`zaro hamkorlikning strategik darajasini alohida ta`kidladi.
O`zaro tovar ayirboshlash hajmi oshgani qayd etildi. So`nggi sakkiz yilda O`zbekiston va Tojikiston o`rtasidagi tovar ayirboshlash hajmi 3 barobar oshib, 2023 yilda 750 million dollarga etdi, yil boshidan esa yana 40 foizga oshdi. Shu bilan birga, ikki mamlakat iqtisodiyoti salohiyatini hisobga olgan holda, yaqin yillarda o`zaro tovar ayirboshlash hajmini 2 milliard dollarga etkazish bo`yicha yangi ulkan maqsadlar e`lon qilindi.
Investisiyaviy hamkorlik sohasida salmoqli natijalar kuzatilmoqda – bugungi kunda ikki davlat hududida 370 dan ortiq qo`shma korxona faoliyat ko`rsatmoqda, vaholanki, 2017 yilda ularning soni atigi 17 tani tashkil etgan edi.
Xo`janddagi “Zelal-tex” ip-kalava va tayyor to`qimachilik mahsulotlari ishlab chiqarish korxonasi hamda Dushanbe shahridagi “Artel” maishiy texnika ishlab chiqarish korxonalari muvaffaqiyatli loyihalar qatoridan joy olgan. “Oybek-Fotexobod” chegara punkti va “Andarxon” savdo-logistika markazida savdo zonasini tashkil etish, Tojikistonning Zarafshon daryosida ikkita GES qurish kabi salmoqli qo`shma loyihalarning amalga oshirish ishlari faol olib borilmoqda.
Shuningdek, mamlakat hukumati yangi sarmoyaviy loyihalarga har tomonlama yordam ko`rsatishga to`liq tayyor ekanligi bildirildi.
O`z navbatida, Tojikiston Bosh vazirining o`rinbosari Usmonali Usmonzoda ham savdo, sarmoyaviy va sanoat kooperasiyasi sohasidagi hamkorlikni rivojlantirish salohiyatini yuqori baholadi va ikki mamlakat ishbilarmon doiralari vakillarini faol hamkorlik qilishga, sheriklik aloqalarini o`rnatishga chaqirdi.
Biznes-forum yakunlari bo`yicha hujjatlar to`plami imzolandi, ular asosida har bir loyihani amalga oshirishning aniq ijrochilari va muddatlarini o`z ichiga olgan “Yo`l xaritasi” ishlab chiqiladi.
