O`zbekiston musulmonlari idorasi raisi, muftiy Shayx Nuriddin Xoliqnazar hazratlari Musulmon dunyosidagi eng nufuzli tashkilot hisoblangan Islom olami uyushmasi Oliy kengashiga a`zo bo`ldi.
Ta`kidlash kerakki, ushbu a`zolik Muftiy hazratlari faoliyatlari davomidagi to`rtinchi yirik tashkilotga a`zo bo`lishlaridir. Avval Xalqaro musulmon ulamolari kengashi, Musulmon donishmandlar kengashi va Islomiy fiqh akademiyasi kengashi a`zoliklariga qabul qilinganlari haqida e`lon qilgan edik.
Aziz muxlislarimizga, Islom olami uyushmasining musulmon dunyosidagi maqomi, maqsad-vazifalari haqidagi ma`lumotlarni e`tiboringizga havola etamiz.
Islom olami uyushmasi (Robitat al-olam al-islomiy) – jahonning turli mamlakatlarining yirik musulmon ulamolarini birlashtirgan xalqaro islomiy tashkilot bo`lib, 1962 yilda tashkil etilgan.
Qarorgohi Saudiya Arabistonining Makka shahrida joylashgan. Riyoz, Jidda va Madina shaharlarida ham bo`limlari bor. Mazkur uyushma xalqaro islomiy nodavlat tashkilotlarning etakchisi sifatida qaraladi.
