Qonunchilik palatasi deputatlari chet el fuqarolari va fuqaroligi bo`lmagan shaxslarning O`zbekistonda bo`lishini nomaqbul deb topish asoslari va tartibini belgilovchi qonun loyihasini uchinchi o`qishda qabul qildi.
Qonun loyihasi bir guruh deputatlar tomonidan qonunchilik tashabbusi asosida ishlab chiqilgan. U «O`zbekiston Respublikasida chet el fuqarolarining va fuqaroligi bo`lmagan shaxslarning huquqiy holati to`g`risida»gi qonuniga o`zgartirish va qo`shimchalar kiritishni nazarda tutadi.
U bilan O`zbekistonning davlat suverenitetiga, hududiy yaxlitligiga va xavfsizligiga zid bo`lgan, davlatlararo, ijtimoiy, milliy, irqiy hamda diniy adovatni keltirib chiqaruvchi, O`zbekiston xalqining sha`ni, qadr-qimmatini yoki tarixini tahqirlovchi mazmundagi ommaviy chiqishlar qilish yoxud harakatlar sodir etish shaxsni O`zbekiston Respublikasida bo`lishini nomaqbul deb topish uchun asos bo`lishi belgilanmoqda.
Shuningdek, mazkur toifadagi chet el fuqarolari yoki fuqaroligi bo`lmagan shaxslarga besh yil davomida O`zbekistonga kirish, banklarda hisobvaraq ochish, ko`chmas mulk sotib olish, davlat mulkini xususiylashtirishda ishtirok etish, moliyaviy va shartnomaviy munosabatlarga kirishishni taqiqlash taklif etilmoqda. Qonun loyihasida mamlakatda bo`lishi nomaqbul deb topilgan shaxslarni deportasiya qilish asoslari va tartibi ham nazarda tutilgan.
