Bu haqda Bosh prokuratura huzuridagi Departament qoshidagi Alkogol va tamaki bozorini tartibga solish inspeksiyasi tomonidan tomonidan tashkil etilgan davra suhbatida ma’lum qilindi.
Suhbat davomida iste’mol va texnik etil spirti, alkogol va tamaki mahsulotlarini ishlab chiqarish va ularning aylanmasi hajmini hisobga olish axborot tizimi, xavfni tahlil qilish tizimi, iste’mol va texnik etil spirti tashuvchi avtotransport vositalari harakatini markazlashtirilgan tarzda monitoring va nazorat qilish imkoniyatiga ega geoaxborot tizimini boshqa manfaatdor idoralarning axborot tizimlari bilan integratsiya qilish masalalari muhokama etildi.
Sohada bu kabi yangi tizimlarni yaratishda ishlab chiqaruvchi korxonalarni bosqichma-bosqich integratsiya qilish bo‘yicha reja-grafik ishlab chiqildi.
Bu jarayon respublikadagi barcha spirt va alkogol ishlab chiqaruvchi korxonalarni qamrab oladi va bu orqali mahsulotlarning noqonuniy aylanmasini kamaytirish hamda aksiz solig‘i to‘lovlarini to‘liq hisobga olish imkoniyati oshiriladi.
Joriy yilda 68 ta iste’mol va texnik etil spirti hamda alkogol mahsulotlari ishlab chiqarish korxonalarida realizatsiya qilingan etil spirti hamda ishlab chiqarilgan alkogol mahsulotlari miqdorining onlayn hisobini yuritadigan elektron o‘lchov uskunalarining hisobga olish axborot tizimiga integratsiya qilinishi rejalashtirilgan.
Shuningdek, ishlab chiqaruvchi korxonalarga videokuzatuv vositalarini o‘rnatilishi yuzasidan qo‘shimcha talabnomalar yig‘ilib, zarur choralar ko‘rilmoqda.