Samarqandda dahshatli avariya: Nexia ikki piyodani va yana bir Nexia’ni urib ketdi (Video)

Samarqand shahrida Nexia avtomobili yo`l chetidan yurib borayotgan ikki piyodani hamda shu erda to`xtab turgan yana bir Nexia’ni zarb bilan urib ketdi. Bu haqda “Daryo” xabar bermoqda.

Postga ilova qilingan videoda kuzatuv kamerasi qaydi aks etgan bo`lib, unda avtomobil yo`li chetida Nexia to`xtab turganini ko`rish mumkin. Unga orqa tomondan ikki piyoda yaqinlashib kelayotgan vaqtda esa boshqa bir Nexia katta tezlikda ularni orqadan kelib urib yuborgan. Piyodalarning ikkisi ham turli tomonga otilib ketganini, zarbaga uchragan Nexia bir necha metrgacha surilib ketganini ko`rish mumkin.

Izohlardan ma`lum bo`lishicha, mudhish hodisa Samarqanddagi trikotaj zavodi yaqinida yuz bergan. O`zini piyodalardan birining qo`shnisi deb tanishtirgan foydalanuvchi uning 21 yoshda ekanligini va kuni kecha dafn etilganini ta`kidlagan. Guruhning yana bir a`zosi esa ikkinchi piyoda o`lim to`shagida yotganini ma`lum qilgan.

Foydalanuvchilarning ko`pchiligi ushbu holatda aybni to`liq haydovchiga yuklagan hamda uning shahar ko`chasida bunday katta tezlikda va ehtiyotsizlik bilan mashina haydashini kechirib bo`lmaydigan holat deb atagan. Shuningdek, piyodalar yo`lagi bo`la turib, avtomobil yo`lidan yurgan ikki piyodani vaziyatga sababchi qilganlar ham topildi.