Ukraina Qurolli Kuchlari Bryansk viloyatidagi obyektga ATACMS raketalari bilan hujum qildi, deya xabar qildi Rossiya Mudofaa vazirligi
Vazirlikka ko‘ra, Ukraina tomonidan qo‘llangan ATACMS raketalaridan beshtasi urib tushirilgan va bittasi shikastlangan.
Rossiya Mudofaa vazirligiga tegishli “Zvezda” telekanalining xabar berishicha, raketalarning bo‘laklari “harbiy obyektning texnik hududi”ga tushgan va yong‘in yuzaga kelgan. Xabarda bu qanday harbiy inshoot ekanligini ma’lum qilinmagan.
Bryansk viloyatiga ATACMS raketalari bilan qilingan hujum G‘arb ziddiyat kuchayishini xohlayotganidan dalolat beradi, dedi Rossiya Tashqi ishlar vaziri Sergey Lavrov G20 sammiti o‘tayotgan Rio-de-Janeyrodagi matbuot anjumanida.
Rossiya TIV rahbari, shuningdek, G‘arb davlatlariga Rossiyaning yangilangan yadroviy doktrinasini o‘qib chiqishni maslahat berdi.
Rossiya Bryansk viloyatiga qilingan hujumga yadroviy javob choralarini ko‘ryaptimi degan savolga javob berar ekan, Lavrov Rossiya rasmiylari "yadro quroli birinchi navbatda har qanday yadro urushining oldini olishga qaratilganligiga ishonch hosil qilishini" aytdi.
