Buyuk Britaniyaning The Financial Times gazetasi ham Donald Trampni "Yil odami" deb e’lon qildi.
Gazeta maqolasida keltirilgan fikrlarga ko‘ra, Donald Trampning ikkinchi prezidentlik muddatida Ukrainaga ko‘rsatilayotgan yordamni qirqish, Yevropa Ittifoqining jipsligini zaiflashtirish, shuningdek, Xitoy bilan bitim tuzish yoki savdo urushini boshlashi kutilmoqda.
“Bu yilgi saylovlarda Tramp hokimiyat tepasiga qaytishiga oid o‘ziga xos jihatlari bois The Financial Times gazetasi tanloviga aylandi. Endi Trampni tasodifiy hodisa deb hisoblab, ahamiyat bermaslik mumkin emas”, deyiladi maqolada.
Kattagina hajmdagi ushbu maqolaning satrlari orasida norozilik kayfiyatini ham payqash mumkin. Nashr Trampning qayta saylanishini “zamonaviy AQSH tarixidagi eng dramatik qaytish" deb atagan.
Maqola shunday eslatma bilan yakunlanadi: "Ba’zilar Tramp 2.0 yangi tartibni emas, balki betartiblikni anglatadi, deb taxmin qilishmoqda. Nima bo‘lishidan qat’iy nazar, Trampning qaytishi AQSH siyosati va diplomatiyasida pulga asoslangan yangi zarhal asrning boshlanishidan darak beradi."
Ta’kidlash joiz, mohiyatiga ko‘ra The Financial Times gazetasi avvaldan ham Donald Trampning muxlisi bo‘lmagan. Masalan, gazeta noyabr oyida uning Madison Square Garden namoyishlarini “irqchilik ufurib turibdi" deb ta’riflagan edi. Tramp saylovlarda g‘olib chiqqach, "Global iqtisodiyot Tramp zarbasidan shokka tushishga tayyorlanmoqda" degan sarlavhada maqola chop etdi.
Eslatib o‘tamiz, avvalroq AQSHning Time haftalik jurnali ham Donald Trampni “Yil odami” deb e’lon qilgan edi.
Abdulloh Sayyid
