Toshkent shahrida Davlat xavfsizlik xizmati va Ichki ishlar bosh boshqarmasi xodimlari tomonidan noqonuniy kriptoaktivlar aylanmasi bilan shug‘ullangan guruh faoliyati fosh etildi.
Ma’lum qilinishicha, ushbu guruh ijtimoiy tarmoqlarda soxta investitsiya platformasini reklama qilgan. Reklamada davlat amaldorlari, mashhur shaxslar hamda Prezident obrazlaridan foydalanilib, fuqarolarni sarmoya kiritishga ishontirishga urinilgan.
Tergov ma’lumotlariga ko‘ra, gumonlanuvchilar tomonidan amalga oshirilgan P2P operatsiyalar va kriptovalyuta noqonuniy aylanmasi hajmi 1,5 million AQSh dollaridan oshgan.
Shuningdek, guruh a’zolari 100 dan ortiq O‘zbekiston fuqarosini aldab Qozog‘istonga olib chiqqan va ular nomiga bank kartalar ochtirib, kriptooperatsiyalarda foydalangan.
Tergov davomida ushbu jinoiy sxema ortida xorijlik firibgarlar turgani, ammo asosiy ijrochilar O‘zbekiston fuqarolari ekani aniqlangan.
Mazkur holat bo‘yicha Jinoyat kodeksining 278-8-moddasi 3-qismi "а" bandi bilan jinoyat ishi qo‘zg‘atilgan. Ushbu modda 3 yildan 5 yilgacha ozodlikdan mahrum etish jazosini nazarda tutadi.
Gumonlanuvchilarga nisbatan qamoq ehtiyot chorasi qo‘llanilgan, tergov harakatlari davom etmoqda.
