Belarus prezidenti Aleksandr Lukashenko Rossiya prezidenti Vladimir Putin bilan ikki davlatni birlashtirish masalasini hech qachon muhokama qilmaganini ma’lum qildi. Uning so‘zlariga ko‘ra, Minsk va Moskva "sayyoramizda mavjud bo‘lmagan noyob ittifoqni" yaratgan.
"Oramizda bir davlatga birlashish yoki bir-birimizni qo‘shib olish haqida hech qanday suhbat bo‘lmagan"— dedi Lukashenko mamlakat prezidentligiga saylovlarda ovoz berishdan keyingi matbuot anjumanida.
Uning ta’kidlashicha, Rossiya va Belarus kelgusida qanday hamkorlik qilish va birga mavjud bo‘lish masalalarini muhokama qilmoqda. Lukashenko ikki davlat o‘rtasidagi munosabatlarda hamma narsa oson kechmayotganini, ammo muammolarni yengib, oldinga siljishni davom ettirayotganini qo‘shimcha qildi.
Shuningdek, u Moskva va Minsk sobiq sovet respublikalari havas qiladigan ittifoqni qurishini va’da qildi.
Belarusda prezident saylovlari oldidan Rossiya va Belarus tashqi ishlar vazirlari Sergey Lavrov va Maksim Rijenkov telefon orqali suhbatlashib, ikki tomonlama hamkorlik masalalarini muhokama qilgan va barcha masalalar bo‘yicha ishchi aloqalarni saqlab qolishga kelishib olgan.
Eslatib o‘tamiz, Aleksandr Lukashenko Belarusda bo‘lib o‘tgan prezidentlik saylovlarida 86%dan ortiq ovoz to‘pladi.
Abdulloh Sayyid
