Koreya Xalq Demokratik Respublikasi (KXDR) Tashqi ishlar vazirligi AQSH va Janubiy Koreya tomonidan qo‘yilgan “harbiy provokatsiyalar”ga javoban qattiq choralar ko‘rilishini ma’lum qildi.
KXDR Tashqi ishlar vazirligining bayonotida aytilishicha, "AQSH KXDR suvereniteti va xavfsizlik manfaatlarini inkor etayotgan ekan, ularga qarshi faqatgina qat’iy choralar ko‘riladi. KXDR AQSH va Janubiy Koreya o‘rtasidagi harbiy ittifoq tufayli kuchlar muvozanati buzilishiga yo‘l qo‘ymaydi va ularga qarshi kuchli javob choralari qo‘llaydi". Bu haqda Koreya Markaziy telegraf agentligi xabar berdi.
Bayonotga ko‘ra, AQSH va Janubiy Koreya 21–24 yanvar kunlari qo‘shma aviatsiya mashg‘ulotlari o‘tkazgan.
Shuningdek, 14–16 yanvar kunlari o‘qotish bo‘yicha birgalikdagi mashg‘ulotlar uyushtirgan. 22 yanvar kuni esa AQSH Janubiy Koreyaga qurol yetkazib berish borasidagi kelishuvlar haqida ma’lum qilgan.
KXDRning ta’kidlashicha, Vashington va Seulning bu harakatlari harbiy ittifoqni mustahkamlash orqali mintaqadagi vaziyatni yomonlashtirmoqda. Shu bilan birga, Pxenyan AQSHni Korey yarim orolida harbiy ustunlikka erishish uchun harakat qilayotganlikda aybladi.
Avvalroq KXDR suv osti kemalari uchun mo‘ljallangan strategik boshqariladigan raketa sinovlarini o‘tkazgan edi. Mamlakat raketasozlik idorasi ushbu sinovlarni mamlakatning mudofaa qudratini mustahkamlash va strategik raqiblariga qarshi turish uchun amalga oshirilganligini ma’lum qildi.
Mintaqadagi keskinlik oshib borayotgan bir paytda KXDRning bu bayonoti xalqaro jamoatchilik diqqatini yanada kuchaytirmoqda.
Abdulloh Sayyid
