Корея Халқ Демократик Республикаси (КХДР) Ташқи ишлар вазирлиги АҚШ ва Жанубий Корея томонидан қўйилган “ҳарбий провокациялар”га жавобан қаттиқ чоралар кўрилишини маълум қилди.
КХДР Ташқи ишлар вазирлигининг баёнотида айтилишича, "АҚШ КХДР суверенитети ва хавфсизлик манфаатларини инкор этаётган экан, уларга қарши фақатгина қатъий чоралар кўрилади. КХДР АҚШ ва Жанубий Корея ўртасидаги ҳарбий иттифоқ туфайли кучлар мувозанати бузилишига йўл қўймайди ва уларга қарши кучли жавоб чоралари қўллайди". Бу ҳақда Корея Марказий телеграф агентлиги хабар берди.
Баёнотга кўра, АҚШ ва Жанубий Корея 21–24 январь кунлари қўшма авиация машғулотлари ўтказган.
Шунингдек, 14–16 январь кунлари ўқотиш бўйича биргаликдаги машғулотлар уюштирган. 22 январь куни эса АҚШ Жанубий Кореяга қурол етказиб бериш борасидаги келишувлар ҳақида маълум қилган.
КХДРнинг таъкидлашича, Вашингтон ва Сеулнинг бу ҳаракатлари ҳарбий иттифоқни мустаҳкамлаш орқали минтақадаги вазиятни ёмонлаштирмоқда. Шу билан бирга, Пхеньян АҚШни Корей ярим оролида ҳарбий устунликка эришиш учун ҳаракат қилаётганликда айблади.
Аввалроқ КХДР сув ости кемалари учун мўлжалланган стратегик бошқариладиган ракета синовларини ўтказган эди. Мамлакат ракетасозлик идораси ушбу синовларни мамлакатнинг мудофаа қудратини мустаҳкамлаш ва стратегик рақибларига қарши туриш учун амалга оширилганлигини маълум қилди.
Минтақадаги кескинлик ошиб бораётган бир пайтда КХДРнинг бу баёноти халқаро жамоатчилик диққатини янада кучайтирмоқда.
Абдуллоҳ Саййид
