Shveysariya olimlari tomonidan “Nature Aging” xalqaro ilmiy jurnalida e’lon qilingan tadqiqot natijasi keng jamoatchilikda katta qiziqish uyg‘otdi. Bu haqda Sog‘liqni saqlash vazirligi Matbuot xizmati xabar qilmoqda.
Unda insonning qarish jarayonini sekinlashtirishga doir samarali usul haqida so‘z yuritiladi.
Qayd etilishicha, uch yil davom etgan keng qamrovli tadqiqotda 70 va undan katta yoshdagi 2000 nafardan ortiq sog‘lom odamlar ishtirok etgan.
Tajriba qatnashchilari ikki guruhga bo‘lingan holda, belgilangan muddatda D hamda Omega-3 vitaminlarini turli kombinatsiyalarda qabul qilib, jismoniy mashg‘ulotlar bilan shug‘ullandi.
Eng samarali natija Omega-3 darmondorisini qabul qilgan guruhda qayd etildi: tegishli tekshiruvlardan so‘ng ularda hujayralarning qarishi sezilarli darajada sekinlashgani aniqlandi.
O‘z navbatida, D vitamini va jismoniy mashg‘ulotlar ham ijobiy natija berishi ma’lum bo‘ldi.
Olimlarning yakuniy xulosasiga ko‘ra, Omega-3 va D vitaminlari hamda muntazam jismoniy mashqlarni o‘z ichiga olgan kompleks yondashuv insonlarda qarish tezligini 1-4 foizga sekinlashtirishi mumkin.
