Ma’lum qilinishicha, holat 31 yanvar kuni shaharning Buyuk ipak yo‘li ko‘chasida sodir bo‘lgan. YPX inspektori davlat raqami bo‘lmagan Onix avtomashina haydovchisiga to‘xtash ishorasini bergan. Biroq haydovchi uning talabiga bo‘ysunmay mashinani xodimning ustiga haydagan, uni kapot ustida bir muddat sudragan va jarohat yetkazib qochib ketgan.
Jinoyat ishlari bo‘yicha Samarqand shahri sudida ayblanuvchi o‘sha kuni otasi mast holatda onasiga kuch ishlatayotgani haqidagi xabarni eshitgandan so‘ng uyga shoshganini bildirgan va aybidan pushaymon bo‘lib, suddan yengillik berishini so‘ragan.
YPX inspektori esa sudlanuvchiga nisbatan da’vosi yo‘qligini va unga qamoq bilan bog‘liq bo‘lmagan jazo berishni so‘ragan.
Sud haydovchini Jinoyat kodeksining 219-moddasi 2-qismi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan aybli deb topdi va 3 yil muddatga ozodligini chekladi.
