Маълум қилинишича, ҳолат 31 январь куни шаҳарнинг Буюк ипак йўли кўчасида содир бўлган. ЙПХ инспектори давлат рақами бўлмаган Onix автомашина ҳайдовчисига тўхташ ишорасини берган. Бироқ ҳайдовчи унинг талабига бўйсунмай машинани ходимнинг устига ҳайдаган, уни капот устида бир муддат судраган ва жароҳат етказиб қочиб кетган.
Жиноят ишлари бўйича Самарқанд шаҳри судида айбланувчи ўша куни отаси маст ҳолатда онасига куч ишлатаётгани ҳақидаги хабарни эшитгандан сўнг уйга шошганини билдирган ва айбидан пушаймон бўлиб, суддан енгиллик беришини сўраган.
ЙПХ инспектори эса судланувчига нисбатан даъвоси йўқлигини ва унга қамоқ билан боғлиқ бўлмаган жазо беришни сўраган.
Суд ҳайдовчини Жиноят кодексининг 219-моддаси 2-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) билан айбли деб топди ва 3 йил муддатга озодлигини чеклади.
