Joriy yilning 27-mart kuni Xorazm viloyatining Shovot tumanida 2004-yilda tug‘ilgan yigit katta benzin sisternasining ichiga tushib, chiqolmasdan vafot etdi. Bu haqda Bosh prokuratura matbuot xizmati rahbari Hayot Shamsutdinov “Darakchi.uz”ga xabar berdi.
Bildirilishicha, ushbu holat yuzasidan Xorazm viloyatining Shovot tumani tibbiyot birlashmasi shifokori IIBga murojaat qilib, tumandagi “Shohobod 2022” MCHJ benzin quyish shoxobchasining sisternasi ichida 19-20 yoshlar atrofida bo‘lgan shaxs vafot etganligini aytgan.
Ma’lum bo‘lishicha, 1999-yilda tug‘ilgan, ushbu benzin quyish shoxobchasida ishchi-operator bo‘lib ishlovchi fuqaro I.K. 27-mart kuni soat 13:30 larda tanishi Z.R.ning uyiga borib, benzin quyish shoxobchasidagi 10 tonnalik sisternaning ichini tozalash kerakligini, evaziga ish yakunlangandan so‘ng xizmat haqini berishini aytgan.
So‘ng Z.R. vaqti yo‘qligini va farzandi M.O. bilan birgalikda sisternani ichini tozalashini aytgan. Fuqaro I.K. 2004-yilda tug‘ilgan M.O. bilan birgalikda soat 15:30 larda benzin quyish shoxobchaning sisternasini tozalashni boshlagan.
Ish davomida M.O. sisternaning ichiga narvon qo‘yib, qo‘lida belkurak bilan tushib tozalayotgan vaqtda sisterna ichidagi yoqilg‘i qoldiqlari hididan zaharlanib, hushidan ketgan.
Bu holatni I.K. ko‘rib, unga yordam berish uchun sisterna ichiga tushib, M.O.ni ko‘tarib chiqayotgan vaqtida o‘zi ham hushini yo‘qotishni boshlagan. Shu vaqtda I.K.ning ukasi O.O. kiyimidan ushlab tortib olgan, M.O. esa sisterna ichida hushsiz qolib ketib, vafot etgan.
Ma’lumot uchun, Z.R. va farzandi M.O. 2024-yil davomida ushbu benzin quyish shoxobchasining sisternalarini 4 marta tozalab bergan va evaziga har biri uchun 100-150 ming so‘m olgan.
