Noqonuniy migratsiyaga qarshi kurashish doirasida o‘tkazilgan tezkor tadbirlarda fuqarolarni xorijga ishga yuborishni va’da qilib, pul talab qilgan shaxslarning noqonuniy faoliyatiga chek qo‘yildi.
Davlat xavfsizlik xizmati ma’lumotiga ko‘ra, Toshkent viloyatining Chinoz tumanida yashovchi, muqaddam bir necha marta sudlangan shaxs poytaxtlik 24 yoshli fuqaroning ishonchiga kirgan. U mansabdor tanishlari orqali fuqaroni AQShga ishchi vizasi asosida yuborish va barcha zarur hujjatlarni rasmiylashtirib berishni va’da qilgan. Bu xizmatlar evaziga 22 ming AQSh dollari talab qilib, oldindan 5 ming dollar olgan vaqtida ashyoviy dalillar bilan qo‘lga olingan.
Shunga o‘xshash holat Andijon viloyatida ham aniqlangan. Izboskan tumanida yashovchi 1993 yilda tug‘ilgan shaxs asakalik 26 yoshli fuqaroni Janubiy Koreyaga ishga yuborishni va’da qilib, buning uchun 6 ming dollar so‘ragan. U oldindan 3 ming dollar olgan vaqtida DXX va huquqni muhofaza qiluvchi organlar xodimlari tomonidan ushlangan.
Tergovga qadar tekshiruv jarayonida mazkur shaxs avval ham boshqa bir fuqarodan Janubiy Koreyaga ishga jo‘natish va’dasi bilan pul olgani ma’lum bo‘lgan.
Hozirda har ikki holat bo‘yicha jinoyat ishlari qo‘zg‘atilgan bo‘lib, tergov harakatlari davom etmoqda.
