“Amazon” kompaniyasi xorijdan yetkazilayotgan mahsulotlar uchun bojxona to‘lovlarini ochiqlash rejasidan voz kechdi. Bu haqda “Punchbowl News” manbasi xabar berdi.
Unga ko‘ra, kompaniya ichida shunday g‘oya muhokama qilingan, biroq u rasman qabul qilinmagan va hozirda amalga oshirilmaydi.
Oq uy matbuot kotibi Kerolayn Livitt bu ehtimoliy qadamni “Amazon tomonidan siyosiy va dushmanona harakat” deb baholagan va kompaniya asoschisi Jeff Bezosni Xitoy bilan hamkorlikda ayblagan.
“Amazon” kompaniyasi vakillari esa bu fikr amalda hech qachon qo‘llab-quvvatlanmaganini ta’kidlab, ayrim mahsulotlarga nisbatan muhokama qilinganini tasdiqladi, ammo keyinchalik bu g‘oyadan butunlay voz kechilganini bildirdi.
Joriy yilning 29 aprel kuni Tramp bu masalaga munosabat bildirib, “Bezos juda yaxshi odam, u muammoni tez hal qildi. U to‘g‘ri qaror qabul qildi. Yaxshi yigit”, — degan.
Avvalroq AQSh prezidentI bu masalada Bezosning o‘ziga shaxsan qo‘ng‘iroq qilib, norozilik bildirgan.
