Bugun Hindiston G‘arbidagi Axmadobod shahri yaqinida yirik aviahalokat sodir bo‘ldi. Bu haqda Reuters xabar berdi.
Ma’lum qilinishicha, Air India aviakompaniyasiga tegishli Boeing 787 Dreamliner uchog‘i mahalliy vaqt bilan ertalab soat 09:30 atrofida yerga qulagan.
Samolyot Axmadoboddan London shahriga reysni amalga oshirayotgani va uning bortida 133 nafar yo‘lovchi va ekipaj a’zolari bo‘lgani ma’lum qilindi. Halokat vaqtida uchoq yonib ketgan.
Hindiston fuqaro aviatsiyasi boshqarmasi (DGCA) tomonidan berilgan ma’lumotlarga ko‘ra, hozirda tergov ishlari boshlangan.
Hozircha rasmiylar halok bo‘lganlar va jarohatlanganlar sonini aniq bayon etmagan bo‘lsalar-da, mahalliy OAV ma’lumotlariga ko‘ra, halokat oqibatida 100 nafarga yaqin inson qurbon bo‘lgani taxmin qilinmoqda.
Ayni paytda Axmadobod xalqaro aeroportida xavfsizlik choralari kuchaytirilgan, reyslar vaqtincha kechiktirilmoqda yoki boshqa manzillarga yo‘naltirilmoqda.
