Toshkent viloyatining Qibray tumanida 1,9 mlrd so‘mlik tabiiy gazdan noqonuniy foydalangan tadbirkorlar aniqlandi, deb xabar bermoqda "Hududgazta’minot" AJ.
Xabarga ko‘ra, Qibray tumanining “Salor” mahallasida joylashgan noturar bino xatlovdan o‘tkazilganda, fuqaro Sh.A. kafel ishlab chiqarish sexi tashkil etib, loyiha-texnik hujjatlarisiz tabiiy gaz tarmog‘iga noqonuniy ulanib olgani ma’lum bo‘ldi.
“E-ma'muriy” dasturi orqali hisob-kitob qilinganida gaz ta’minoti korxonasiga 955 mln 583 ming so‘m miqdorida zarar yetkazilgani aniqlandi.
Shuningdek, Oqqo‘rg‘on tumani “Usta Nurmat” MFYda joylashgan “R.Q.” MCHJga qarashli novvoyxonada gaz tarmog‘iga tegishli loyiha-texnik hujjatlarisiz ulangani aniqlandi.
Holat bo‘yicha 946 mln 080 ming so‘mlik zarar qayta hisob-kitob qilindi.
Aniqlangan holatlar bo‘yicha hujjatlar rasmiylashtirilib, tegishli tartibda huquqni muhofaza qiluvchi idora vakillariga topshirildi.
