Namangan shahrida Davlat xavfsizlik xizmati va ichki ishlar organlari hamkorligida o‘tkazilgan tezkor tadbirda xalqaro terroristik tashkilot – “Islom Davlati Xuroson Viloyati” tarafdorlaridan iborat noqonuniy guruhning faoliyati fosh etildi. Bu yashirin "jamoat"ni tashkil qilgan shaxs va uning a’zolari terroristik g‘oyalarni targ‘ib qilib kelgani aniqlangan. Bu haqda DXXning axborot xizmati xabar berdi.
Xabarga ko‘ra, guruhning 16 nafar a’zosi yashagan manzillarda tintuv o‘tkazilib, 37 ta mobil telefon, 51 dona noshirligi ko‘rsatilmagan diniy adabiyot, 40 ta DVD disk, 4 ta flesh-karta hamda bir nechta noutbuk va planshetlar ashyoviy dalil sifatida olib qo‘yildi. Surishtiruv jarayonida ma’lum bo‘lishicha, ushbu guruh a’zolari xalqaro terroristik tashkilotlarning g‘oyaviy rahnamolaridan o‘rgangan holda "jihad" va "shahidlik"ni targ‘ib qilib kelgan.
Shuningdek, guruh yetakchisi Telegram messenjerida 120 nafardan ortiq a’zoga ega virtual kanallar ochib, u yerda ekstremistik materiallar, “Islom Davlati” atributlari va radikal ruhdagi audio-video fayllarni tarqatgan. Ular yoshlarni “shariat hukmi” asosida jihodga undash va mamlakatda olib borilayotgan siyosiy hamda diniy islohotlarga qarshi norozilik ruhida tarbiyalashni maqsad qilgan.
Aniqlanishicha, guruh rahbari 2022 yilda Turkiyaning Istanbul shahrida maxsus "hujra"da diniy saboq olgan. Bu jarayondan so‘ng uning qarashlari keskin o‘zgargan va hatto otasi uni to‘g‘ri yo‘lga chaqirmoqchi bo‘lganda, otasini ham "kofir" deb e’lon qilgan.
Hozirda guruh tashkilotchisi va 3 nafar faol a’zosi ustidan Jinoyat kodeksining tegishli moddalari bilan ish qo‘zg‘atilgan va ular qamoqqa olingan. Qolgan a’zolar bo‘yicha ham surishtiruv ishlari davom etmoqda.
