Yangihayot tumanida fuqarolar va doʻkon egasi oʻrtasida yuzaga kelgan mahalliy kelishmovchilik "ommaviy janjal" sifatida talqin qilinib, asossiz muhokamalarga sabab boʻldi. Holat yuzasidan 4 nafar shaxsga nisbatan bayonnoma rasmiylashtirildi.
Kecha, 14 avgust kuni soat 22:35 atrofida Yangihayot tumani Yangi Choshtepa mahallasida 2001 yilda tugʻilgan R.B. va 2006 yilda tugʻilgan A.F., T.A., M.A. spirtli ichimlikni doʻkondan xarid qilib, toʻlov qilmasdan ketmoqchi boʻlgan. Doʻkon egasi ularni toʻxtatgan va shu orada bahsga sabab boʻlgan mojaro yuzaga kelgan.
IIB xabariga koʻra, mazkur shaxslar jamoat joyida baqir-chaqir qilib, fuqarolar tinchligini buzgan. Voqea joyiga etib kelgan ichki ishlar organlari xodimlari ular bilan profilaktik suhbat oʻtkazib, ularni IIBga olib borgan.
Hech kim tan jarohati olmagan. R.B., A.F., T.A. va M.A.ga nisbatan MJtKning 183-moddasi (mayda bezorilik) va 194-moddasi (IIO xodimining qonuniy talablarini bajarmaslik) boʻyicha bayonnomalar rasmiylashtirilib, sudga yuborilgan.
