Xitoy Xalq Respublikasi Raisi Si Tszinpinning taklifiga binoan, 30 avgustdan 3 sentyabrgacha O‘zbekiston Respublikasi Prezidenti Shavkat Mirziyoyev ushbu mamlakatga rasmiy tashrif buyuradi.
31 avgust – 1 sentyabr kunlari O‘zbekiston rahbari Tyanszin shahrida bo‘lib o‘tadigan Shanxay hamkorlik tashkilotiga aʼzo davlatlar rahbarlari kengashi yig‘ilishi va “ShHT plyus” formatidagi sammitda ishtirok etadi.
Tadbirlar kun tartibiga ko‘p tomonlama hamkorlikni ustuvor yo‘nalishlarda kengaytirish va tashkilot faoliyatini yanada takomillashtirishga oid dolzarb masalalar kiritilgan. Yig‘ilish yakunlariga ko‘ra Tyanszin deklaratsiyasi, qo‘shma hujjatlar va xavfsizlik, raqamli iqtisodiyot, “yashil” sanoat, energetika, turizm va boshqa sohalarda sheriklikni rivojlantirish va mustahkamlashga qaratilgan qarorlar qabul qilinishi rejalashtirilgan.
2 sentyabr kuni Pekin shahrida davlat rahbari Xitoy Xalq Respublikasi Raisi Si Tszinpin bilan muzokaralar olib boradi, shuningdek, rasmiy shaxslar va Xitoyning yetakchi kompaniyalari rahbarlari bilan uchrashuvlar o‘tkazadi. Uchrashuvlar chog‘ida har tomonlama strategik sheriklikni chuqurlashtirish va amaliy hamkorlikni kuchaytirish masalalari muhokama qilinadi.
O‘zbekiston Prezidenti 3 sentyabr kuni Ikkinchi jahon urushidagi G‘alabaning 80 yilligiga bag‘ishlangan tantanali tadbirlarda ishtirok etadi.
