Ayrimlar shartnomani bekor qilgan, biroq va'da qilingan pul oylar davomida qaytarilmagani aytiladi. Kompaniya esa kechikishlarni "ichki jarayonlar" bilan izohlamoqda.
Mijozlar bildirayotgan fikrlarga ko'ra, 2023–2024 yillarda turar joy loyihalaridan uy sotib olgan bir qator xaridorlar keyinchalik ruxsat hujjatlari to'liq emasligi, joylashuv aytilgandek bo'lmaganini bilib, shartnomani bekor qilgan. Ammo asosiy savol — nima uchun pul vaqtida qaytarilmayapti?
274 million so'm to'lov qilgan ayolning aytishicha, kompaniya pulni bir oyda qaytarishni va'da qilgan, ammo oradan 10 oy o'tib ham mablag' olinmagan. U kompaniya vakillari bilan uchrashishning o'zi muammo bo'layotganini, ayrim muloqotlarda bosim sezilganini aytadi.
Yana bir xaridor — 100 million so'm to'lov qilgan fuqaro — joylashuv haqidagi noto'g'ri ma'lumot sabab shartnomani bekor qilganini, ammo pulni ololmay bir necha oy qatnagani haqida gapirdi.
Boshqa bir mijoz esa "Imarat Development" reklamalari asosida uy sotib olganini, biroq va'da qilingan qurilish ishlari hozirgacha boshlanmaganini aytadi. Loyiha "sust ketayotgani"dan shikoyatlar ortmoqda.
Mazkur e'tirozlar ommaga chiqqach, Marat Hamdamov muammolarni hal qilishini bildirgan edi. Kompaniya vakili ham ayrim mijozlarga pul qaytarilganini tasdiqladi, ammo qolganlari bo'yicha jarayonlar "yuridik bosqichda" ekani aytildi.
Shu bois savol hanuz ochiq qolmoqda: nima uchun mijozlar pulini olish uchun oylab navbat kutishi kerak?
Norozilik bildirayotganlar soni esa ortib bormoqda. Tarmoqlarda tarqalgan videolarda pulini talab qilib boranda sog'lig'i yomonlashib, tez yordam chaqirtirgan mijozlar ham ko'rinadi.
Shu orada, Shahzoda Muhammadova holatga munosabat bildirar ekan, o'zining ijtimoiy tarmoqlardagi sahifasida "Imarat Development"dan uy xarid qilgan fuqarolardan fikr va munosabatini qoldirishni so'radi.
