Sirdaryo viloyatida to‘rt nafar yo‘lovchi bo‘lgan avtomobil kanalga tushib ketishi oqibatida og‘ir yo‘l-transport hodisasi sodir bo‘ldi. Fojia oqibatida barcha yo‘lovchilar halok bo‘lgan, haydovchi esa omon qolgan.
Ma’lum qilinishicha, hodisa joriy yilning 26 dekabr kuni taxminan soat 21:30 larda sodir bo‘lgan. 2001 yilda tug‘ilgan haydovchi futbol o‘yinidan keyin to‘rt nafar tanishini stadiondan olib, ularning uyi tomon yo‘l olgan. Yo‘lda u boshqaruvni yo‘qotib, avtomobil yo‘lovchilar bilan birga kanalga tushib ketgan.
Haydovchi cho‘kayotgan avtomashinadan chiqib ketishga muvaffaq bo‘lgan va shifoxonaga yotqizilgan. 19–20 yoshli to‘rt nafar yo‘lovchi esa halok bo‘lgan. Ular bir mahallada yashagani aytilmoqda.
Mazkur holat yuzasidan Jinoyat kodeksining 266-moddasi 3-qismi “a” bandi bo‘yicha jinoyat ishi qo‘zg‘atilib, tergov harakatlari olib borilmoqda.
