Сирдарё вилоятида тўрт нафар йўловчи бўлган автомобиль каналга тушиб кетиши оқибатида оғир йўл-транспорт ҳодисаси содир бўлди. Фожиа оқибатида барча йўловчилар ҳалок бўлган, ҳайдовчи эса омон қолган.
Маълум қилинишича, ҳодиса жорий йилнинг 26 декабрь куни тахминан соат 21:30 ларда содир бўлган. 2001 йилда туғилган ҳайдовчи футбол ўйинидан кейин тўрт нафар танишини стадиондан олиб, уларнинг уйи томон йўл олган. Йўлда у бошқарувни йўқотиб, автомобиль йўловчилар билан бирга каналга тушиб кетган.
Ҳайдовчи чўкаётган автомашинадан чиқиб кетишга муваффақ бўлган ва шифохонага ётқизилган. 19–20 ёшли тўрт нафар йўловчи эса ҳалок бўлган. Улар бир маҳаллада яшагани айтилмоқда.
Мазкур ҳолат юзасидан Жиноят кодексининг 266-моддаси 3-қисми “а” банди бўйича жиноят иши қўзғатилиб, тергов ҳаракатлари олиб борилмоқда.
