Nyu-York shahri tarixida ilk marta shahar meri Qur'on bilan qasamyod qiladi. Saylovlarda g'alaba qozongan Zohran Mamdani 2026 yil 1 yanvar kuni rasman o'z lavozimiga kirishadi. Bu haqda Associated Press xabar berdi.
Qayd etilishicha, undan avvalgi merlarning aksariyati lavozimga kirishish chog'ida Injil bilan qasamyod qilgan. Biroq AQSh federal qonunchiligiga ko'ra, qasamyod marosimida diniy kitobdan foydalanish majburiy emas.
Saylovoldi kampaniyasi davomida Mamdani asosan yashash xarajatlarining yuqoriligiga e'tibor qaratgan. U o'zining musulmon e'tiqodini ochiq namoyon etib, shaharning besh tumanidagi masjidlarga tashrif buyurgan va janubiy osiyolik hamda musulmon saylovchilarni faol ovoz berishga safarbar etgan.
Saylovlar yakunlariga ko'ra, ikki oydan kam vaqt ichida byudjeti qariyb 120 milliard dollar bo'lgan va 8,5 millionga yaqin aholi istiqomat qiladigan megapolis boshqaruvi musulmon mer qo'liga o'tadi.
AQSh OAVlariga ko'ra, mamlakatning sobiq prezidenti Barak Obama Mamdaniga qo'ng'iroq qilib, uni g'alaba bilan tabriklagan.
Ma'lumot o'rnida, Ugandada tug'ilgan Zohran Mamdani AQSh prezidenti lavozimiga nomzod bo'la olmaydi. U o'zini "demokratik sotsialist" sifatida ta'riflab, arzon oziq-ovqat do'konlari tashkil etish, ayrim uy-joylar bo'yicha ijara to'lovlarini muzlatish va avtobus yo'l haqini bekor qilish tashabbuslarini ilgari surmoqda.
Shahar saylov komissiyasi ma'lumotlariga ko'ra, bu galgi saylovlarda qatnashgan saylovchilar soni 1969 yildan beri ilk bor 2 million kishidan oshgan.
