Inspektsiya ma’lumotiga ko‘ra, Maktabgacha va maktab ta’limi vazirligi tizimidagi bog‘cha va maktablarda so‘nggi ikki yil ichida 17 nafar xodim og‘ir tan jarohati olgan, yana ikki nafar xodim vafot etgan.
Tahlillarga ko‘ra, 2024 yilda 12 ta baxtsiz hodisa qayd etilgan bo‘lsa, 2025 yilda ular soni 20 taga yetgan. Inspektsiya bu holatlarni mehnatni muhofaza qilish qoidalariga rioya etilmayotgani, malakali mutaxassislar yetishmasligi va nazorat sustligi bilan izohladi.
Shuningdek, vazirlik va tizim tashkilotlariga mehnat xavfsizligi choralarini qayta ko‘rib chiqish, mas’ul mutaxassislarni tayinlash va rahbarlar javobgarligini kuchaytirish bo‘yicha topshiriqlar berildi. Qonun talablariga amal qilmaslik ma’muriy va jinoyiy javobgarlikka sabab bo‘lishi mumkin.
