3 mart kuni Shavkat Mirziyoyev ayollar va bolalar huquqlarini himoya qilishni kuchaytirishga qaratilgan takliflar bilan tanishdi. Unga ko‘ra, mamlakatda nikohni 21 yoshga etgan shaxslar o‘rtasida tuzishni rag‘batlantirish maqsadida qo‘shimcha moliyaviy qo‘llab-quvvatlash mekanizmlari joriy etiladi.
Qayd etilishicha, yurtimizda nikohlarning 40 foizi 18–19 yoshdagilar o‘rtasida tuzilmog‘da. Biroq xalqaro tashkilotlar tomonidan eng maqbul nikoh yoshi sifatida 21 yosh tavsiya etilgan. Bu yoshda shaxslar, odatda, moliyaviy mustaqillikka erishib, oila qurishga har tomonlama tayyor bo‘ladi.
Shu asosda qator tashabbuslar ilgari surildi. Jumladan:
• 21 yoshga etganlar o‘rtasida nikoh tuzilishini rag‘batlantirish uchun moliyaviy qo‘llab-quvvatlash joriy etish;
• davlat boji bo‘yicha imtiyozlar berish orqali nikoh shartnomasi tuzishni rag‘batlantirish;
• nikoh yoshiga oid qonunchilikni buzganlik uchun jarimaning 15 foizini bu haqda xabar bergan shaxsga berish tartibini joriy etish;
• erta nikoh va 16 yoshgacha homiladorlik holatlari haqida ichki ishlar organlari hamda “Inson” ijtimoiy xizmatlar markazlariga majburiy xabar berish tizimini yo‘lga qo‘yish;
• homilador yoki 3 yoshgacha farzand tarbiyasi bilan band talaba qizlarga ta’limni davom ettirish imkonini yaratish.
Ma’lum qilinishicha, davlat rahbari usbu tashabbuslarni ma’qullab, tegishli farmonni imzolagan. Shuningdek, yangiliklarni keng jamoatchilik orasida targ‘ib qilish bo‘yicha mutasaddidlarga topshiriqlar berilgan.
