Toshkentdagi Magic Safari bog‘ida voyaga yetmagan qizlarga nisbatan shilqimlik qilgan shaxsga sud hukmi o‘qildi. Sud hujjatlariga ko‘ra, 1979 yil Buxoro viloyatida tug‘ilgan Sh.Y. 2026 yil 24 fevral kuni Yangihayot tumanidagi bog‘da qizlarga sha’ni va qadr-qimmatini kamsituvchi uyatsiz so‘zlar aytgan, ularni kuzatib, shahvoniy shilqimlik qilgan.
Shuningdek, u ichki ishlar organlari xodimlarining qonuniy talablariga bo‘ysunmagan, haqorat qilgan va qochib ketishga uringan. Jinoyat ishlari bo‘yicha Yangihayot tuman sudi uni Ma’muriy javobgarlik to‘g‘risidagi kodeksning 41-1 va 194-moddalari bilan aybli deb topib, 2 mln 60 ming so‘m jarima hamda 5 sutka ma’muriy qamoq jazosi tayinladi.
Nodira Hakimova bu kabi holatlarni jinoyat sifatida baholash kerakligini ta’kidlab, voyaga yetmaganlarga nisbatan sodir etilgan bunday xatti-harakatlar uchun jazoni kuchaytirish zaruriligini aytgan. Uning so‘zlariga ko‘ra, endilikda bunday holatlarda prokuratura qo‘shimcha nazorat o‘rnatib, jinoyat alomatlari mavjud bo‘lsa, ish jinoyiy tartibda ko‘rib chiqiladi.
