Isroil bosh vaziri Binyamin Netanyaxu Eronning yangi oliy rahnamosi Mujtabo Xomanayini o‘ldirish bilan tahdid qildi. Bu haqda Reuters xabar berdi.
Netanyaxu Eron qarshi urush boshlangandan buyon ilk bor matbuot anjumani o‘tkazdi. U mazkur tadbirda Eron "endi avvalgidek emas"ligini, Islom inqilobi qo‘riqchilari korpusi va Basij yarimharbiy kuchlariga zarba berilganini aytdi.
Isroil bosh vaziri urushga qo‘shilgan Livanning "Hizbulloh" guruhiga qarshi hujumlar davom etishini aytdi. Eron oliy rahnamosi Oyatulloh Ali Xomanayiy 28 fevral kuni havo hujumlari oqibatida o‘ldirilganidan so‘ng 2 mart kuni "Hizbulloh" Isroilga qarshi zarbalar berishni boshladi. Livan guruhini buni Xomanayiy o‘limi uchun qasos deb atadi. Eronning o‘ldirilgan oliy rahnamosi o‘rnini uning o‘g‘li Mujtabo Xomanayiy egalladi.
Netanyaxudan Eronning yangi oliy rahnamosi va "Hizbulloh" yetakchisiga qarshi qanday choralar ko‘rilishi haqida so‘raldi.
"Men terrorchi tashkilot rahbarlaridan birortasiga ham hayot sug‘urtasi polisisini bermagan bo‘lardim... Bu yerda nimalarni rejalashtiryotganimiz yoki nima qilmoqchi ekanimiz haqida aniq hisobot berish niyatim yo‘q", deya javob berdi Isroil bosh vaziri.
Isroil Eronga hujumdan maqsad Tehrunning yadroviy va ballistik raketa dasturlari tufayli yuzaga kelayotgan "ekzistensial tahdidni bartaraf etish" ekanini ma'lum qilgan. Shuningdek, eronliklarni qo‘zg‘olonga undash orqali hukumat qulatishga chaqirgan.
Urush boshlangandan beri Eronda hukumatga qarshi norozilik alomatlari kuzatilmadi. Netanyaxu hukumat qulmagan taqdirda ham u zaifligicha qolishini aytdi.
"Biz qanday choralar ko‘rayotganimizni batafsil aytmayman. Biz rejimni ag‘darish uchun optimal sharotitlarni yaratmoqdamiz, biroq Eron xalqi rejimni ag‘darar, deb to‘liq ishonch bilan aytolmasligimni inkor qilmayman, rejim ichkaridan ag‘dariladi. Ammo biz, shubhasiz, yordam bera olamiz va yordam beryapmiz ham", dedi Netanyaxu.
