Bugun, 8 may kuni Rossiyaning Rostov-Don shahrida joylashgan aeronavigatsiya ofisi hududiga dron tushishi ortidan mamlakat janubidagi 13 ta aeroport faoliyati vaqtincha cheklandi. Bu haqda “Meduza” nashri xabar berdi.
Ma’lum qilinishicha, “Janubiy Rossiya aeronavigatsiya kompaniyasi” filialining ma’muriy binosi yaqiniga dron qulashi xavfsizlik choralarining kuchaytirilishiga sabab bo‘lgan.
Shu munosabat bilan Sochi, Volgograd, Krasnodar, Grozniy, Astrahan, Vladikavkaz, Gelendjik, Maxachqal’a, Magas, Mineralnie Vodi, Nalchik, Stavropol va Elista aeroportlarida uchish-qo‘nish reyslari vaqtincha to‘xtatilgan.
Dastlabki ma’lumotlarga ko‘ra, o‘nlab reyslar kechiktirilgan yoki bekor qilingan. Oqibatda minglab yo‘lovchilar aeroportlarda kutib qolgan.
Rosaviatsiya esa parvoz ekipajlarini joriy etilgan vaqtinchalik cheklovlar haqida ogohlantirgan.
Eslatib o‘tamiz, avvalroq Rossiya 9 may munosabati bilan vaqtinchalik sulh e’lon qilgan edi. Biroq Ukraina Prezidenti Vladimir Zelenskiy mazkur sulhga amal qilmasligini bildirgan.
Shuningdek, u Rossiya bilan yaqin munosabatda bo‘lgan davlatlar rahbarlariga murojaat qilib, 9 may kuni Moskvaga bormaslikni tavsiya etgan. Mazkur vaziyat fonida maxsus xizmatlar Rossiya Prezidenti Vladimir Putin xavfsizligini ta’minlash bo‘yicha qo‘shimcha choralar ko‘rishni boshlagan.
