Бугун, 8 май куни Россиянинг Ростов-Дон шаҳрида жойлашган аэронавигация офиси ҳудудига дрон тушиши ортидан мамлакат жанубидаги 13 та аэропорт фаолияти вақтинча чекланди. Бу ҳақда “Медуза” нашри хабар берди.
Маълум қилинишича, “Жанубий Россия аэронавигация компанияси” филиалининг маъмурий биноси яқинига дрон қулаши хавфсизлик чораларининг кучайтирилишига сабаб бўлган.
Шу муносабат билан Сочи, Волгоград, Краснодар, Грозний, Астрахан, Владикавказ, Геленджик, Махачқалъа, Магас, Минералние Води, Нальчик, Ставрополь ва Элиста аэропортларида учиш-қўниш рейслари вақтинча тўхтатилган.
Дастлабки маълумотларга кўра, ўнлаб рейслар кечиктирилган ёки бекор қилинган. Оқибатда минглаб йўловчилар аэропортларда кутиб қолган.
Росавиация эса парвоз экипажларини жорий этилган вақтинчалик чекловлар ҳақида огоҳлантирган.
Эслатиб ўтамиз, аввалроқ Россия 9 май муносабати билан вақтинчалик сулҳ эълон қилган эди. Бироқ Украина Президенти Владимир Зеленский мазкур сулҳга амал қилмаслигини билдирган.
Шунингдек, у Россия билан яқин муносабатда бўлган давлатлар раҳбарларига мурожаат қилиб, 9 май куни Москвага бормасликни тавсия этган. Мазкур вазият фонида махсус хизматлар Россия Президенти Владимир Путин хавфсизлигини таъминлаш бўйича қўшимча чоралар кўришни бошлаган.
