Jahongir Otajonov Yulduz Usmonovaga atab kuylagan qo`shig`i orqali nimalar demoqchi?

Xonanda Jahongir Otajonov 11-12-13 mart kunlari Yoshlar ijod saroyida “Lola” deb nomlangan konserti oldidan matbuot anjumani o`tkazgani haqida avvalroq xabar bergandik.

Tadbir davomida xonanda o`zining yangi konserti haqida ma`lumot berar ekan, dasturdan Yulduz Usmonovaga atalgan tarona ham joy olganini qayd etdi.

O`zbekiston xalq artisti Yulduz Usmonova 2005 yildagi konsert dasturida “Xorazmlik qizlarga” nomli qo`shiq kuylagan edi, Jahongir Otajonovning “Yulduz Usmonovaga...” kuylagan taronasi esa ushbu qo`shiqqa javob bo`ladi.

Jahongir Otajonov o`zining ushbu taronasi shunday deydi:

“Mazkur taronam Yulduz Usmonovaning bundan bir necha yil avval kuylangan taronasiga javoban kuylangan. O`shanda Yulduz Usmonova tomonidan kuylangan mazkur qo`shiq menga tekkandi.

Ushbu qo`shig`imni yaratganimga ancha bo`lgan biroq ayrim sabablarga ko`ra qo`shiq taqdim etilmagandi. Yangi konsertimda xorazmlik opa singillarim uchun javob berishga qaror qilib, “Xush kelibsiz Xorazmga” deb qo`shiq kuyladim.

Kim qaerda yursa yurtim bag`ri kengdir
Qay millatu, qay shevada bari tengdir,
Deya ko`rmang, bir birovga kim u mengdir
Hasad qilmang Xorazmning qizlariga
Yulduz tugul oy chiqolmas tizlariga...

Yulduz Usmonovani san`atkor sifatida hurmat qilaman, ustoz deb bilaman. Balki Yulduz Usmonova meni yomon ko`rib qolar ushbu qo`shig`imdan so`ng, ammo barbir kuylayman.

Mening maqsadim xorazmlik opa-singillarimning javobini qaytarish, xorazmlik yigit sifatida bu meni burchim deb bilaman”,

deya fikrini muxtasar qildi Jahongir Otajonov.

Quyida Yulduz Usmonovaning xorazmlik qizlarga atab kuylagan mazkur taronasi va u bilan nima demoqchi bo`lganligi aks etgan videoni havol qilamiz.