​Bayramga nima sovg`a qilasiz? O`zimiz aytamiz!

Sezib yuribmiz, bilib turibmiz, shu kunlarda xotirangiz parishon. Axir kutilayotgan bayramga sanoqli kunlar qoldi! Sizning esa bizni qanday xushnud etishni bilmay, boshingiz qotgan. Axir biz nozikoyimlar na issiqqa ko`namiz, na sovuqqa. Mayli, hech ham diqqat bo`lmang, o`zimiz sizga ko`maklashib yuboramiz. Buning uchun quyidagi kichkina topshiriqni bajarsangiz bas.

Shartimiz!

Hisob-kitobga ustaligingiz sir emas, muhtaram janoblar. Qani, quyidagi misolni eching-chi.

Endi biz tug`ilgan kunning sanasi tarkibidagi sonlarni qo`shasiz. Bitta songa adashsangiz ham, mo`ljalni to`g`ri ololmaysiz. Masalan, men 1987 yilning 1 mart sanasida tug`ilganman: 1+9+8+7+1+0+1=28=2+8=10=1+0=1

Eslatma: natija bir xonali son chiqquncha, misolni echaverasiz. Chiqqan natijaning ta`rifiga qarab sovg`a tanlashni boshlang.

Kimga qanaqasidan?

1. Eh, biz — birinchilar juda boshqachamiz-da. Sizning atrofingizdagi ayollardan birining raqami «1» bo`lsa, otni qamchilashga biroz kechikdingizmi, deb qo`rqaman. Chunki shosha-pisha olingan, yo`qdan ko`ra bor, deya ulashilgan sovg`alardan boshimiz ko`kka etmay qoladi. Mayli, kayfiyatni tushirmang. Hali hisobingizda besh kun bor. Gapning dangalini aytsak, bizga qulay, foydali va original sovg`alar yoqadi. Buning ustiga, ayni paytda nimaga ehtiyojimiz bor, shuni ham hisobga oling. Ana, soch quritgichimiz kuyib qolgan bo`lsa, darrov bir quchoq atirgul bilan ko`tarib keling, qarabsizki, bizdan baxtli ayol yo`q dunyoda! Yoki birga do`kon aylanishni taklif qilib, ko`nglimiz jiz etgan libosni ko`z ostingizga olib qo`yishingiz mumkin. Xullas, istaklarimizni bilib oling, so`ramang faqat.

2. Bu raqam ostiga yashiringan xonimlarning xobbilari sizga yordam beradi. Ularning sevimli mashg`ulotlari qanaqa? Pishir-kuydirni jonidan sevadimi, marhamat, katta bo`ladimi yoki kichik biror oshxona buyumi sovg`a qiling. Kunning quyosh charaqlagan qismini ofisda o`tkazadigan ayollarga esa ish stolini bezab, unga kayfiyat ulashib turadigan nimadir tuhfa qilishni maslahat beramiz. Masalan, orxediya guli. Shartimiz, odatiy sovg`alaringiz noodatiy ko`rinishda bo`lsin!

3. Ijodkor, betakror ayollarimizning fe`l-atvoriga «Bir, ikki, uch, uchdan keyin puch» iborasi juda mos-da. Shunnig uchun, etti o`lchab, bir kesib, sovg`a tanlang. Masalan, devorga osilsa, uyga ko`rk bag`ishlaydigan manzarali surat, nafis matodan ishlangan sharf kabilar ayni muddao. Yana tong sahardan onangiz, ayolingiz yoki qizingizni bir dona bo`lsa-da, sevimli guli yoxud orzusidagi narsasi bilan xushnud etsangiz ham, ularning ko`ngli tongdek yorishadi.

4. Natija shu raqam chiqqan bo`lsa, tabriklaymiz sizni! Axir bu raqam «Sovg`aning katta-kichigi bo`lmaydi», deya firklaydigan ayollarimizga xos. Yumshoq o`yinchoqmi, tabriknomami, boringki, finjonmi — ularga xush kelaveradi. Hattoki bir o`q bilan ikki quyonni urib, ro`zg`orga kerakli nimanidir tuhfa qilsangiz ham, quvonchlari ichiga sig`maydi. Erkaklar, shuncha engillikka yarasha, chiroyli guldasta esdan chiqmasin-a?!

5. Ishlari doim besh bo`lishini istaydiganlarga, albatta, ishbilarmonlarga xos sovg`alar ma`qul keladi. Deylik, telefon, noutbok, hech bo`lmaganda, organayzer. Faqat ularni syurpriz syurprizdek bo`lsin deya, dabdabali qilib o`ramang. O`rami sovg`angizning stiliga mos bo`lsin.

6. Go`zallikning shaydolariga juda chiroyli tuhfalar yoqadi. Kichkina buyum bo`lsa, go`zalligi ko`zni quvnatishi shart. Nozik did bilan ishlangan soat, taqinchoqlar to`plami, bejirim ko`ylak, klatch — mana, sizga takliflar. Buning uchun sovg`a sohibasining didini bilsangiz kifoya. Yoki biror yaqiningizdan tanlashishni iltimos qilarsiz (masalan, oyingizga rafiqangiz bilan birga sovg`a tanlashingiz mumkin).

7. Bu raqamni bejizga omad belgisi deyishmas ekan-da! Axir atrofingizdagi ayollarning shu raqam bilan bog`liqlari «Hamma gap e`tibor-da» degan shior ostida yashaydilar. Bu yog`i himmatingizga bog`liq, mehr-muhabbatingizni chiroyli izhor qilsangiz bas. Oilangizdagi ayollarga ertalabdan chiroyli dasturxon bezatsangiz, 7 mart kechasi sovg`alarni xonalariga qo`yib chiqsangiz, hamkasblaringizning esa stol ustida tuhfalar bilan kutib olsangiz, nur ustiga nur bo`lardi.

8. Hayotdan mo``jizalar kutib yashovchi bu toifa xonimlar romantik sovg`alarni jon dilidan sevishadi. Shuning uchun antiqa narsalarga ixtiyor bering. Ertaknamo bayram tashkillashtiring. Gullar, shirinliklar bilan uyingizni bezatib chiqing. Fantaziyani ishga solsangiz, ayolingiz bir yil davomida og`zidan bol tomib, sizni maqtab yuradi!

9. «9» raqami chekingizga tushgan bo`lsa, oilangiz ayollarini restoran, konsert kabilarga taklif qilishingiz mumkin. Qaniydi, biror chet el mamlakatiga sayohat uchun chiptalar bilan qutlasangiz. Bahonada o`zingiz ham bir ko`ngil yozib kelardingiz. A, labbay, albatta, deysizmi? Yashang! Umuman olganda, maslahatimiz, shu kun pulingizga ziqnalik qilmang! Axir 8 Mart sanasi taqvimda birgina-ku!

Ha aytgancha, eng muhimi, tabriklash marosimi uchun chiroyli va samimiy nutq tayyorlash ham yoddan ko`tarilmasin... Yana hayajonlanib, qovun tushirib o`tirmang, deymiz-da...

MUXLISA tayyorladi.