Toshkent shahridagi Inha universitetida yangi “IUT-Skyline” texnologiya markazining taqdimoti bo`lib o`tdi. Markaz oliy o`quv yurti talabalarining loyiha va ishlanmalarini amalga oshirishga xizmat qiladi, deb yozadi O`zA.
Markaz axborot-kommunikasiya texnologiyalari sohasida yuqori malakali mutaxassislar tayyorlashni yanada takomillashtirish, talabalarning istiqbolli loyiha va g`oyalarini amalga oshirish, ularni zamonaviy dasturiy ta`minot mahsulotlari ishlab chiqishga jalb etish maqsadida Toshkent shahridagi Inha universiteti va “Skyline” kompaniyasi o`rtasida imzolangan o`zaro anglashuv memorandumi ijrosi doirasida tashkil etildi.
Bugungi kunda Toshkent shahridagi Inha universitetida professor-o`qituvchilar malakasini, ta`lim tizimi sifati va samaradorligini oshirish, talabalarning ijodiy va ixtirochilik faoliyatini qo`llab-quvvatlashga yo`naltirilgan qator loyihalar amalga oshirilmoqda. Xususan, yosh o`qituvchi va ilmiy xodimlar xorijdagi etakchi oliy ta`lim muassasalari, jumladan, Janubiy Koreyada bilim va malakasini oshiradi.
Shuningdek, universitetda “Microsoft” korporasiyasining zamonaviy kompyuter uskunalari va dasturiy ta`minot bilan jihozlangan, so`nggi operasiya tizimlari va ofis dasturlarida ishlash ko`nikmasini egallashga xizmat qiladigan o`quv xonasi faoliyat yuritmoqda.
Mazkur oliy o`quv yurti “Skyline” kompaniyasi bilan hamkorlikda talabalarning innovasion g`oyalarini qo`llab-quvvatlash maqsadida yangi loyihani amalga oshirmoqda. “IUT-Skyline” texnologiya markazi ham ushbu loyiha doirasida tashkil etildi. Universitet talabalari o`z g`oya va loyihalarini amalga oshirishda markaz mutaxassislaridan amaliy yordam so`rash, maslahat olish va ularni baholash uchun markazga murojaat qilishi, “Skyline” kompaniyasining zamonaviy dasturiy ta`minot mahsulotlarini ishga tushirish va optimallashtirishda, tajribali dasturchilarning mahorat darslarida ishtirok etishi mumkin.
