1996 yili 18 oktyabr kuni Sohibqiron tavalludining 660 yilligi munosabati bilan Amir Temur xiyoboniga tutash hududda Temuriylar tarixi davlat muzeyi barpo etilgan.Temuriylar davri me`morchiligiga zamonaviy arxitektura an`analarini uyg`unlashtirib bunyod etilgan muzey binosi Sohibqiron davridagi saroylarga monand. Muzeyning balandligi 31, diametri 70 metr. Muzey gumbazini yoritib turgan "Zumrad" deb nomlangan muazzam qandilning og`irligi ikki tonnadan oshadi. Unga besh yuzta yoritgich jamlangan. Muzey uch qavatdan iborat. Birinchi qavatida xazinaxona, kutubxona, anjumanlar zali, ma`muriyat joylashgan. Ikkinchi qavatdagi devor markazidan davlatimiz rahbari Islom Karimov g`oyasi asosida miniatyurachi rassomlar S.Qoraboev, G`.Kamolov, X.Nazirov, T.Boltaboev tomonidan ishlangan "Buyuk Sohibqiron – buyuk bunyodkor" deb nomlangan panno joy olgan. Uchinchi qavatdan Markaziy Osiyoning ilk Uyg`onish davridan to Sohibqiron davrigacha va temuriylar hayotidan hikoya qiluvchi eksponatlar, rang-barang osori atiqalar o`rin olgan. Dastlab muzey fondidan 600 eksponat joy olgan bo`lsa, bugungi kunda ularning soni 3,5 mingdan oshadi. Jahonning ko`plab mamlakatlarida o`tkazilayotgan xalqaro ko`rgazmalarda muzey o`zining nodir eksponatlari bilan faol qatnashayotgani mamlakatimizning boy tarixi, qadimiy madaniyati va buyuk ajdodlarimiz merosini xorijda ham keng targ`ib etishga xizmat qilmoqda. O`tgan davrda muzeyda juda ko`plab ko`rgazmalar tashkil etildi. Fransiya, AQSh, Germaniya, Avstraliya kabi mamlakatlarda o`tkazilgan ana shunday ko`rgazmalar xalqaro jamoatchilikda katta qiziqish o`yg`otdi. O`tgan davr mobaynida muzey xalqimizning qutlug` qadamjolaridan biriga aylandi. Mamlakatimizga tashrif buyurgan oliy va yuqori martabali mehmonlar, rasmiy delegasiyalar vakillari yurtimizning boshqa diqqatga sazovor joylari qatori Temuriylar tarixi davlat muzeyini ham katta qiziqish bilan tomosha qiladi.
