Dengiz va okeanlarning ifloslanishining asosiy sabablaridan biri bu neft. Negaki, neft qoldiqlari suv yuzasini berkitib, suv osti olamida yashovchi jonivorlarning nafas olishiga to`sqinlik qiladi. Bu esa o`z navbatida juda keskin vaziyatlarni yuzaga keltiradi. AQShning Agronne milliy laboratoriyasi olimlari bu muammoga ham ajoyib yo`l topishdi...
Olimlar suv yuzasidagi neft qoldiqlarini o`zida to`plovchi yumshoq matoni o`ylab topishdi. Mazkur mato neft quyqumlarini, suv yuzasidagi 85% neftni shimib olish xususiyatiga ega. AQSh olimlarining bu olamshumul ixtirosi tufayli ko`plab muammolarga echim topilishi kutilmoqda. Matoda to`plangan neftni maxsus mashinalar siqib oladi va qayta ishlaydi.
Ixtirochi olimlardan biri shunday deydi: “Mazkur mato orqali atrof-muhitga, suv osti olamida yashovchi jonivorlarga hayot baxsh eta olamiz va ularga zarar keltirayotgan suv yuzasidagi neft qoldiqlaridan samarali foydalanib, uni ijobiy maqsadlarga yo`naltira olamiz. Hozirda biz mazkur ixtironi yanada takomillashtirish ustida ishlamoqdamiz va yaqin kunlarda bu ixtiro omma e`tiboriga havola etiladi.”
