Shaharsozlik kengashlaridagi idoralar o'rtasida hamkorlik yetishmasligi tanqid qilinib, qaror qabul qilish tizimini soddalashtirish belgilandi. Endilikda tadbirkorlar muammosiga hokimlar boshchiligida yakuniy yechim beriladi.
Qayd etilishicha, joylarda 26 ta idora o'rtasida muloqot yo'qligi sansalorlikka sabab bo'layotgan edi. Shu bois, shaharsozlik kengashiga Toshkent shahri va viloyat hokimlari boshchilik qilib, masalalarni tezkor hal etishi ko'zda tutilmoqda.
Shuningdek, "Shaffof qurilish" reytingida lizing asosida olingan texnikalarga ball berilmayotgani noto'g'ri ekani ta'kidlandi. Ushbu texnikalar hisobga olinsa, kamida 500 ta korxona reytingini yaxshilab, 17 trillion so'mlik bozorga kirish imkoniyatiga ega bo'ladi. Qurilish vazirligiga bunday texnikalar elektron bazasini yaratib, tizimga integratsiya qilish topshirildi.
Bundan tashqari, pudrat korxonalariga yiliga faqat bitta maxsus texnika olib kirish bo'yicha cheklovni bekor qilish zarurligi qayd etildi. Mutasaddilarga uch oy muddatda qurilishga ruxsat olishdan tortib, ob'ektni foydalanishga topshirishgacha bo'lgan jarayonlarni tahlil qilib, talablar, muddatlar va to'lovlarni ikki barobargacha qisqartirish bo'yicha taklif kiritish vazifasi yuklandi.
