Shavkat Mirziyoev ijodkor bolalar bilan suhbatlashdi Prezident Shavkat Mirziyoev Qoraqalpog`istonga tashrifining ikkinchi kuni Ibroyim Yusupov nomidagi iqtidorli bolalar maktab-internatiga tashrif buyurdi.
Davlatimiz rahbari joriy yil 21 yanvar kuni Nukus shahrida Qoraqalpog`iston va O`zbekiston xalq shoiri, O`zbekiston Qahramoni Ibroyim Yusupov nomidagi maktab bunyod etish, maktab oldida shoir haykalini o`rnatish, bosmaxona tashkil qilish zarurligini ta`kidlagan edi.
Shunga muvofiq Nukusda uch qavatli zamonaviy maktab barpo etilgan. Ibroyim Yusupov haykali o`rnatilgan joy ijodkorlar, yoshlar uchun yana bir xiyobonga aylangan. Maktab qoshida kitoblarni tarjima qilish va chop etish markazi ham tashkil etilgan.
Prezidentimiz bu erda o`qituvchi va o`quvchilar, qoraqalpog`istonlik adiblar bilan uchrashdi.
Maktab o`quvchilari Ibroyim Yusupov she`rlaridan o`qib berdi.
Shavkat Mirziyoev bu erni ma`naviyat maskaniga aylantirish, atoqli shoir va yozuvchilarimiz ijodini xalqimizga va butun dunyoga tarannum etish zarurligini ta`kidladi. Buning uchun mamlakatimizning boshqa hududlarida tashkil etilgan Ibrat, Hamid Olimjon va Zulfiya, Erkin Vohidov, Abdulla Oripov, Muhammad Yusuf nomidagi maktablar bilan aloqalar o`rnatish, ular o`rtasida ijodiy tanlovlar o`tkazish kerak.
Jamiyatda kitobsevarlik muhitini shakllantirish, ayniqsa, yoshlarni kitobga qaytarish zarur.
Prezidentimiz maktab-internatda yaratilgan sharoitlarni ko`zdan kechirdi. Maktab jamoasiga avtobus sovg`a qilish bo`yicha ko`rsatma berdi.