Toshkent shahrining Chilonzor tumanida ichki ishlar xodimlariga o`g`rilik haqida yolg`on axborot bergan erkak javobgarlikka tortildi. Bu haqda Toshkent shahar IIBB ma`lum qildi.
«10 yanvar kuni soat 22:50 larda Chilonzor tumani Ichki ishlar boshqarmasiga fuqaro Xamidov Baxtiyor Shukurovichdan unga tegishli Matiz rusumli avtomashinasi tuman hududida olib qochilgani haqida habar kelib tushdi», — deyiladi axborotda.
Xabar asosida hodisa sodir bo`lgan joyga tergov-tezkor guruhi etib bordi.
O`tkazilgan tekshiruv natijasida B.Sh. Xamidovning boshqaruvida bo`lgan Matiz Chilonzor tumani S-mavzesi hududida qulflangan va soz holatda turgani, fuqaro mast holda bo`la turib, uning avtomashinasi olib qochilgani haqida yolg`on xabar bergani aniqlandi.
Holat yuzasidan B.Sh. Xamidovga nisbatan MJtKning 199-moddasi (maxsus xizmatlarni qasddan aldab chaqirganlik) bilan ma`muriy bayonnoma rasmiylashtirildi.