Axborot texnologiyalari va kommunikasiyalarini rivojlantirish vazirligida Jahon bankining yurtimizga tashrif buyurgan maxsus vakillari guruhi bilan uchrashuv bo`lib o`tdi. Bu haqida vazirlik Axborot xizmati xabar berdi.
Mazkur delegasiya mamlakatimizda «Raqamli Markaziy Osiyo — Janubiy Osiyo» (Digital CASA) loyihasini amalga oshirishga tayyorgarlik ko`rish yuzasidan tashrif buyurgan. Jahon banki vakillari O`zbekistondagi raqamli rivojlanish holati va natijalar xususida ham muzokaralar olib borishmoqda.
«Digital CASA» loyihasi Osiyoning rivojlanayotgan mamlakatlaridagi AKT infratuzilmasini rivojlantirish, elektron hukumat uchun tizimlar ishlab chiqarish, raqamli iqtisodiyotni joriy qilish va boshqa yo`nalishlarda faoliyat olib borishni ko`zlaydi. Uchrashuvda har ikkala tomon «Digital CASA» loyihasi bo`yicha o`z fikr-mulohaza hamda takliflarini bildirdilar.
O`zbekiston tomoni mamlakatda ushbu loyihaning amalga oshirilishi natijasida kutilayotgan jihatlar haqida o`z qarashlarini ma`lum qildi. Shundan kelib chiqib, Jahon banki bilan hamkorlikning mamlakat axborot texnologiyalari va telekommunikasiyalari tarmoqlarini rivojlantirishdagi ahamiyati qayd etildi.
Uchrashuvda loyihani ishlab chiqish yuzasidan keyingi rejalar belgilab olindi. Shuningdek, Jahon bankining maxsus vakillari O`zbekistondagi vazirlik va idoralar, jumladan IT-muassasalar rahbarlari bilan uchrashuvlarni davom ettirishmoqda.
