Avval xabar berilganidek, Toshkent shahrining Alisher Navoiy, Olmazor, Islom Karimov va Furqat ko`chalari oralig`ida Tashkent City xalqaro biznes markazi bunyod etilmoqda.
Prezident Shavkat Mirziyoev joriy yil 6 aprelda ham bu erga tashrif buyurib, inshootlarni zamonaviy va sifatli qilib qurish bo`yicha ko`rsatmalar bergan edi.
Bugungi kunda mazkur zamonaviy markaz qurilishi ettita lotda jadal olib borilmoqda. Hozirgacha 42 ming kub metr tuproq ishlari bajarilgan, er osti monolit qoplamalarini mustahkamlash yakunlangan.
Xorijiy investorlar ham bu istiqbolli loyihada ishtirok etishga katta qiziqish bildirmoqda. Bugungi kunda “Tashkent City” ma`muriy kengashi tomonidan qariyb 10 sarmoyador sub`ekt bilan hamkorlik tasdiqlangan. Ular orasida Buyuk Britaniya, Germaniya, Janubiy Koreya kabi davlatlarning yirik qurilish kompaniyalari bor.
Davlatimiz rahbari mazkur biznes markazi qurilishining borishi bilan tanishdi, deb xabar berdi Prezident matbuot xizmati.
Quruvchi va muhandislar, xorijlik mutaxassislar bilan suhbatlashdi. Mehmonxona va kongress-xolda xalqaro tadbirlarni o`tkazish uchun barcha sharoitlar yaratish, zallarni bezatish va jihozlashda milliyligimizga e`tibor qaratish zarurligini ta`kidladi.
