O`zbekiston kanalining “Axborot” ko`rsatuvida Samarqand viloyatining sobiq hokimi Turobjon Jo`raev o`z lavozimidan olinishiga rasman izoh berildi.
Unga bildirilgan ishonchni oqlamasdan, jinoiy xatti-harakatlarga yo`l qo`ygani, o`z mansabidan foydalanib, vertikal korrupsion tizimni tashkil qilgani uchun egallab turgan lavozimidan ozod qilinganligi ta`kidlandi.
Shuningdek, qurilish masalalari bo`yicha o`rinbosarlari orqali, uy-joy berish, er ajratish va boshqa masalalarda Turobjon Jo`raev katta miqdordagi pora olganligi to`g`risida O`zbekiston Bosh prokuraturasi huzuridagi Axborot-tahlil multimedia markazi tomonidan tayyorlangan alohida lavha berildi.
Samarqand viloyatining sobiq hokimi Turobjon Jo`raev dastlabki tergov jarayonida barcha aybiga iqror bo`lgan, hech narsani inkor qilmagan.
Shuningdek, qurilish masalalari bo`yicha viloyat hokimi o`rinbosari O`tkir Abdullaev, qurilish bo`yicha mutaxassis Bahodir Xo`jaqulov va hokim yordamchisi Botir Xo`jaqulovlar ham mazkur jinoyat ishiga ayblanuvchi tariqasida jalb qilingan.
Lavhada aytilishicha, Turobjon Jo`raev korrupsion tizimini muvaffaqiyatli yo`lga qo`ya olgan, buni olingan poralar miqdori ko`rsatib turibdi.
Ayblanuvchilar ehtiyot chorasi sifatida qamoqqa olingan.