Istirohat bog`lari va yashil zonalarni tashkil etish metodologiyasi to`g`risidagi nizomni tasdiqlash haqidagi Hukumat qarori qabul qilindi.
Tasdiqlangan nizomga muvofiq istirohat bog`lari aholi punktlarining bosh rejalari va batafsil rejalashtirish loyihalari asosida tashkil etiladi.
Istirohat bog`lariga quyidagi talablar qo`yiladi:
- yuqori texnologik, zamonaviy asbob uskunalar, texnologiyalar va attraksionlar bilan jihozlanganlik;
- zamonaviy landshaft dizaynining ko`llanilganligi;
- favvoralarni qurish;
- velosiped yo`lakchalari, bolalar attraksionlari va oilaviy dam olish ob`ektlarini obodonlashtirish;
- madaniy-dam olish xizmatlaridan foydalanish tizimining mavjudligi.
Istirohat bog`lari hududlarida oilaviy dam olish ob`ektlari, yozgi teatrlar, lektoriylar, o`qish zallari va kutubxonalar, attraksionlar, raqs zallari, tirlar va boshqalar faoliyat yuritishi lozim
Shahar o`rmonlari, xiyobonlar, istirohat bog`lari, shahar bog`lari, piyoda yurish uchun mo`ljallangan xiyobonlar yashil zonalar tarkibiga kiradi.
Istirohat bog`ini tashkil etishda ishtirok etishni istagan xususiy sherik o`zi haqidagi ma`lumotlar, loyihani amalga oshirish maqsadlari, taxmin qilinayotgan ob`ekt yoki er uchastkasi to`g`risidagi ma`lumotlar ilova qilingan arizani davlat sherigiga taqdim etadi.
Ariza 10 kun mobaynida ko`rib chiqiladi.
Davlat sherigi hudud aholisi ehtiyojlaridan, shuningdek jismoniy va yuridik shaxslardan tushgan takliflarni o`rganish natijalari asosida tanlov e`lon qiladi. Tanlov boshlanishidan avval 30 kalendar kunmobaynida tanlov savdolarini o`tkazish to`g`risidagi ma`lumotlar e`lon qilinadi.
Tanlov komissiyasi tomonidan ijobiy tavsiflangan xususiy sherik o`n ish kuni mobaynida ijara shartnomasi yoki konsessiya bitimi tuzadi.
