Janubiy Koreyaning Incheon shahrida o`tkazilayotgan Osiyo o`yinlarida yana bir sportchimiz sovrindorlar safidan o`rin egalladi. Bu haqda O`zbekiston milliy olimpiya qo`mitasi matbuot xizmati xabar beradi.
Karate sport turining kumite bahslarida Vatanimiz sharafini himoya qilgan Barno Mirzaeva (-61 kg.) hal qiluvchi final bahsida malayziyalik Krisnan Jefriga imkoniyatni boy berdi va Osiyo o`yinlarining kumush medali bilan taqdirlandi.
Eslatib o`tamiz, Barno Mirzaeva 2010 yili Guanchjou (Xitoy)da bo`lib o`tgan XVI Osiyo o`yinlarida kumite bo`yicha bo`lib o`tgan musobaqada bronza medaliga sazovor bo`lgan edi.
Incheonda o`tkazilayotgan qit`aning eng yirik sport o`yinlarida chorak final bosqichidan bahslarga kirishgan Barno Mirzaeva dastlab Eron terma jamoasi a`zosini, yarim finalda esa J.Koreya vakilini mag`lub etdi.
Shu tariqa, O`zbekiston delegasiyasi hisobidagi medallar soni 41 taga etdi (9 ta oltin, 12 ta kumush, 20 ta bronza) va hamyurtlarimiz umumjamoa hisobida 10-o`rinni band etib turishibdi.
