"Avtomobilsiz kun" aksiyasida aholi ishtiroki qanday bo`ldi?

Zahiriddin Muhammad Bobur nomidagi Toshkent markaziy eko bog`da Butunjahon ozon qatlamini muhofaza qilish kun”i munosabati bilan “Avtomobilsiz kun” aksiyasi o`tkazildi. Bu haqda O`zA xabar berdi.

Ekologiya va atrof-muhitni muhofaza qilish davlat qo`mitasi, BMT Taraqqiyot dasturi, Global ekologik jamg`armasi va bir qator hamkor vazirlik va idoralar bilan birga tashkil etilgan tadbir erta tongda Amir Temur xiyobonidan Bobur nomidagi Toshkent markaziy ekobog`igacha masofadagi avtomobil yo`lida velomarafon tashkil etildi.

Unda yuzlab kattayu kichik yurtdoshlarimiz ishtirok etdi. Mazkur musobaqa aholi o`rtasida sog`lom turmush tarzini targ`ib qilish, sportni ommalashtirish, tabiatga zarar keltirmaydigan transport vositalaridan foydalanishni targ`ib qilish maqsadida tashkil etildi.

– Mazkur aksiya aholi, ayniqsa, yoshlar o`rtasida sog`lom turmush tarzini targ`ib qilishda muhim omil bo`lmoqda, – deydi BMT Taraqqiyot dasturi mas`ul xodimi A.Xo`jaev. – Tadbir doirasida turli musobaqalar, tanlovlar o`tkazdik. Unda ko`plab yoshlar faol ishtirok etdi. Endilikda avtotransport vositalarisiz harakatlanish mumkinligi va zarurligini namoyish qilishga, uning barcha qatnashchilari tomonidan yo`l harakati qoidalariga rioya etishga ommaviy chaqirishga yo`naltirilgan “Avtomobilsiz kun” oylik aksiyasi muntazam asosda respublikaning barcha hududlarida tashkil etiladi. Maqsad sohada yo`l-transport hodisalari profilaktikasini ta`minlashdir. Aholini tabiatni asrashga jalb etishdir.

Aksiya doirasida bog`da bolalar uchun rasm chizish bo`yicha ijodiy tanlov va tabiatga zarar etkazmaydigan, mamlakatmizda ishlab chiqarilayotgan sovutish uskunalari yarmarkasi ham bo`lib o`tdi.