Shavkat Mirziyoev va birinchi xonim Tojmahalni ziyorat qildi

Shavkat Mirziyoev rafiqasi bilan birga 30 sentyabr kuni Agradagi Toj Mahal majmuasiga tashrif buyurdi. Bu haqda Prezident matbuot xizmati xabar bermoqda.

Prezidentimiz Hindistonga davlat tashrifini ushbu tarixiy obidadan boshlagani bejiz emas. Boburiylar merosi bo`lgan ushbu yodgorlik o`zbek va hind xalqlarining tarixi mushtarakligi, ikki mamlakat aloqalari mustahkam asosga ega ekani ifodasidir.

Ma`lumki, Zahiriddin Muhammad Bobur va uning avlodlari Hindistonda ulkan maqbaralar, qal`alar, shaharlar bunyod etgan. Savdo, ilm-fan, madaniyat, memorchilikni rivojlantirgan. Toj Mahalni ham Bobur bobomizning avlodi Shoh Jahon qurdirgan.

Uning memoriy echimi shunchalik murakkab va noyob bo`lganki, minglab quruvchilar tomonidan 20 yildan ziyod vaqt davomida barpo etilgan. Maqbara va minoralarning hamma joyi oq marmar bilan qoplangan. Yodgorlik yurtimizdagidek naqshlar va Qur`on suralari bilan bezatilgan.

Toj Mahal dunyoning etti mo``jizasidan biri sanaladi. 1983 yilda YuNESKOning jahon merosi ro`yxatiga kiritilgan.

Bu tarixiy obida hamon go`zalligi va muhtashamligi bilan butun dunyo sayyohlarini o`ziga jalb etadi. Bu erga har yili qariyb 5 million turist keladi. Toj mahal Hindistonning turizm salohiyati, ayniqsa, agraliklar hayotida muhim o`rin tutadi.

Maqbara ziyorati chog`ida Qur`on tilovat qilindi.

Hindistonlik rasmiylar bilan muloqotda Prezidentimiz O`zbekistonda ham qadimiy obidalar, muqaddas ziyoratgohlar ko`pligi, ikki mamlakat o`rtasida sayyohlar bordi-keldisini kengaytirish zarurligini ta`kidladi.

Shavkat Mirziyoev majmuaning faxriy mehmonlar kitobiga dastxat yozib qoldirdi.

Davlatimiz rahbari Nyu-Dehli shahriga jo`nab ketdi.