«O`zbekiston» xalqaro anjumanlar saroyida 7 dekabr kuni O`zbekiston Respublikasi Konstitusiyasi qabul qilingan kunning 26 yilligiga bag`ishlangan tantanali tadbir bo`lib o`tdi. Unda Prezident Shavkat Mirziyoyev ma`ruza qildi.
Davlat rahbari keyingi ikki yilda sudlar mustaqilligini ta`minlash bo`yicha ham muhim choralar ko`rilgani haqida gapirdi.
Jumladan, joriy yilning o`zida 1 ming 881 ta jinoyat ishi dalillar etarli bo`lmaganligi sababli tugatilgan, sudlar tomonidan 590 nafar shaxs oqlangan. Bu raqam 2016 yilda – 28 tani, 2017 yilda esa 263 tani tashkil etgan.
Shuningdek, 5 ming 462 nafar shaxsga nisbatan tergovda asossiz qo`yilgan moddalar ayblovdan chiqarib tashlangan, 2 ming 449 nafar shaxs esa sud zalidan ozod qilingan.
"Insonparvarlik tamoyili asosida mutlaqo yangi amaliyot joriy etilmoqda", - dedi Prezident.
Buning natijasida jinoyat yo`liga adashib kirib, qilmishiga chin dildan pushaymon bo`lgan 993 nafar fuqaro, jumladan, 456 nafar yigit-qiz hamda 113 nafar ayollar Yoshlar ittifoqi, mahallalar va xotin-qizlar qo`mitalarining kafilligi bilan jazodan ozod qilingan.
Infografika: «Taraqqiyot strategiyasi» markazi
Shuningdek, jazoni o`tayotgan 3 ming 333 nafar, jumladan, faoliyati man etilgan tashkilotlarga kirib qolgan 646 nafar mahkum afv etilib, oilasi bag`riga qaytarilgan.
